दसैँभत्ताका नाममा बागमती प्रदेश सरकाले पार्यो एक करोड झ्वाम !
भण्डाफोर अभियान संवाददाता
हेटौँडा/बागमती प्रदेशका मन्त्री, सांसद र स्वकीय सचिवहरुले झण्डै १ करोड अर्थात् ९८ लाख रुपैयाँभन्दा बढी रकम दसैँभत्ता बुझेका छन् । प्रदेश सरकारका छ जना मन्त्री, सभामुख र उपसभमुख, ९६ जना सांसदसहित स्वकीयहरुको दसैँभत्ताका लागि ९८ लाख रुपैयाँ भन्दा बढी रकम खर्च भएको छ । बागमती प्रदेशसभा सचिवालय हेटौँडाले सभामुख, उपसभामुखसहित ९६ सांसद र तिनका स्वकीयहरुलाई दसैँभत्ता उपलब्ध गराएको हो भने मन्त्रीहरुलाई मुख्यमन्त्री तथा मन्त्रिपरिषद कार्यालय हेटौँडाले वितरण गरेको हो ।
सभामुख, उपसभामुखसहित सांसद र स्वकीयलाई ८५ लाख ११ हजार ५५० रुपैयाँ दसैँभत्ताबापत वितरण गरिएको सचिवालयले जानकारी दिएको छ । मन्त्री र मन्त्रीका स्वकीयहरुका लागि १३ लाख ७१ हजार ९४१ रुपैयाँ दसैँभत्ता उपलब्ध गराएको मुख्यमन्त्री तथा मन्त्रिपरिषद कार्यालय हेटौँडाले जनाएको छ । मन्त्री, संसद र स्वकीयहरुको दसैँभत्तावापत प्रदेश सरकारको ढुकुटीबाट ९८ लाख ८३ हजार ४९१ रुपैयाँ खर्च भएको छ ।
दसैँभत्ता बापतको रकम ९६ जना सांसदहरुलाई ४९ लाख ५९ हजार रुपैयाँ र स्वकीय सचिवहरूलाई ३२ लाख ९९ हजार ३ सय ५० रुपैयाँ, सभामुख, उपसभामुख र प्रतिपक्षी दलका नेतालाई १ लाख ७७ हजार रुपैयाँ र तिनका स्वकीयहरूलाई १ लाख १२ हजार २२८ रुपैयाँ दसैँभत्तावापत दिइएको हो ।
प्रदेशमा १२ जना मन्त्रीमध्ये छ जनाले मात्र दसैँभत्ता बुझेका छन् भने अन्य छ जना मन्त्रीले बुझेका छैनन् । छ जना मन्त्रीको नियुक्तिको अवधि ६ महिना पूरा नभएकाले उनीहरुलाई अन्यसरह दसैँभत्ता वितरण नगराइएको मुख्यमन्त्री कार्यलयका लेखा अधिकृत देवीप्रसाद गौतमले बताए । मुख्यमन्त्री शालिकराम जम्कट्टेलले दसैँ भत्तावापत ७० हजार ७३० रुपैयाँ तथा पाँच जना मन्त्रीहरुले जनही ६० हजार ३२० रुपैयाँ बुझेका छन् । मुख्यमन्त्री र मन्त्रीहरुका राजनीतिक सल्लाहकार, स्वकीय सचिव, सुरक्षा गार्ड, सवारी चालक, कार्यलय सहयोगीलगायत २९ जनाले ३ लाख ७२ हजार रुपैयाँ दसैँभत्ता बुझेका छन् ।
बागमती प्रदेशसभा सचिवालयका लेखाअधिकृत बालकृष्ण अधिकारीकाअनुसार प्रदेशसभाका सभामुख भुवनकुमार पाठकलाई ६१ हजार ४५० रुपैयाँ, उपसभामुख अप्सरा चापागाईंलाई ५८ हजार रुपैयाँ र प्रतिपक्षी दलका नेतालाई पनि ५८ हजार रुपैयाँ दसैँभत्ता दिइएको छ । उनीहरुका स्वकीय सचिवहरुलाई कुल १ लाख १२ हजार २२८ रुपैयाँ दसैँभत्ता वितरण गरिएको छ ।
सचिवालयले दसैँभत्ता वापत सत्तारुढ दलका मुख्य सचेतकलाई ५६ हजार ८४० रुपैयाँ र विपक्षी दलका प्रमुख सचेतकलाई ५४ हजार ५२० रुपैयाँ दसैँभत्ता उपलब्ध गराएको छ । उता, ९३ जना प्रदेशसभा सदस्यले जनही ५२ हजार दुई सय रुपैयाँका दरले ४८ लाख ५४ हजार ६०० रुपैयाँ दसैँभत्ता बैंक दाखिला गरिएको छ भने उनीहरुको स्वकीय सचिवले ३४ हजार ७३० रुपैयाँका दरले ३२ लाख २९ हजार ८९० रुपैयाँ दसैंभत्ता लिएका छन् । प्रदेशसभाका संसदीय समितिका सभापतिलाई भने दसैँभत्ता वितरण नगरिएको उनले बताए । संसदीय समितिको निर्वाचन नभएको र ज्येष्ठ सदस्यहरुबाट काम भइरहेकाले दसैँभत्ता उपलब्ध नगराइएको उनको भनाइ छ ।
प्रदेशसभा सचिवालयले सभामुख पाठकका स्वकीय सचिव दुई जनालाई उपसचिवसरह ४० हजार ३८० रुपैयाँ, शाखा अधिकृतसरहले ३५ हजार ९ सय ९०, उपसभामुख र प्रमुख प्रतिपक्षी दलको नेताको स्वकीय सचिवलाई शाखा अधिकृतसरह ३५ हजार ९९० र बाँकी सांसदहरुको स्वकीय सचिवलाई नायव सुब्बासरह ३४ हजार ७३० रुपैयाँ दसैँभत्ता खर्च वितरण गरेको छ ।
