चितवनका एम्बुलेन्स ब्यवस्थित गर्न स्वयं एम्बुलेन्स चालककै सक्रियता
आजदेखि ट्रयाकिङ (जीपीएस) प्रणाली लागू
भण्डाफोर अभियान संवाददाता
चितवन, साउन २०(
चितवनमा सञ्चालित एम्बुलेन्सहरुलाई व्यबस्थित गर्न स्वयं एम्बुलेन्स चालकहरु नै सक्रिय भएका छन् । उनीहरुकै पहलमा एम्बुलेन्सहरुलाई व्यबस्थित गर्न आज (आइतबार) देखि ट्रयाकिङ (जीपीएस) प्रणाली लागू गरिएको छ । संयुक्त एम्बुलेन्स चालक संघ चितवनको पहल र टेक्नोलोजी सेल्स प्रालि काठमाडौंको सहयोगमा ट्रयाकिङ प्रणाली लागू गरिएको हो ।
एम्बुलेन्समा राखिएको डिभाइस मार्फत् एम्बुलेन्सको स्थान र गतिविधिबारे जानकारी लिने सिस्टम हो ट्रयाकिङ (जीपीएस) प्रणाली । यो ट्रयाकिङ प्रणालीको नियमन संयुक्त एम्बुलेन्स चालक संघ चितवनले गर्नेछ । भरतपुरमा आयोजित कार्यक्रममा टेक्नोलोजी सेल्स प्रालि काठमाडौंका प्रविधि अनुसन्धानकर्ता रामप्रसाद रिजालले चितवनका प्रदेशसभा सांसद घनश्याम दाहाल ‘अविनाश’लाई ट्रयाकिङ (जीपीएस) प्रणाली हस्तान्तरण गरेर लागू भएको घोषणा गरिएको हो ।
कार्यक्रममा प्रदेशसभा सांसद घनश्याम दाहाल अविनाशले राज्यले गर्नुपर्ने काम संयुक्त एम्बुलेन्स चालक संघले गरेको बताए । उनले ट्रयाकिङ प्रणाली लागू भएपछि चालकमाथि लाग्ने आरोपलाई गलत साबित गर्ने बताए । यसलाई निरन्तरता दिन धेरै चुनौती रहेको भन्दै उनले त्यसको सामना गर्न एम्बुलेन्स चालकलाई सुझाव दिए ।
एम्बुलेन्स ट्रयाकिङ सिस्टममा एम्बुलेन्सको भएको स्थानबारे जानकारी प्राप्त गर्न सकिने टेक्नोलोजी सेल्स प्रालि काठमाडौंका प्रविधि अनुसन्धानकर्ता रामप्रसाद रिजालले बताए । उनले जो कोही अकस्मात बिरामी अथवा दुर्घटनामा परे सबैभन्दा नजिक कुन एम्बुलेन्स छ भन्ने कुरा यस प्रणाली मार्फत् थाहा पाउन सकिने जानकारी दिए ।
एम्बुलेन्स ब्यवसायलाई ब्यवस्थित गर्न र एम्बुलेन्स चालकका गतिविधिलाई सुक्ष्म निरीक्षण गर्न जीपीएस प्रणाली लागू गरेको संयुक्त एम्बुलेन्स चालक संघ चितवनका अध्यक्ष सुमन घलेले बताए । उनले अबका दिनमा एम्बुलेन्स दुरुपायोग नहुने भन्दै यसलाई अझ सेवामुखी बनाइने दाबी गरे । चितवनमा संचालित ९५ वटा एम्बुलेन्समा प्रणाली लागू गरिएको हो ।
