चिलीमा भीषण डढेलो: १८ को मृत्यु, दुई क्षेत्रमा संकटकाल घोषणा

Surya Baral

 |  प्रकासित मिति : ५ माघ २०८२, सोमबार ११:१३

नुब्ले/चिलीको मध्य र दक्षिणी क्षेत्रमा फैलिएको विनाशकारी वन डढेलोका कारण मृत्यु हुनेको संख्या १८ पुगेको छ। राष्ट्रपति ग्याब्रिएल बोरिकले बायोबियो क्षेत्रको कन्सेप्सनमा सञ्चारकर्मीहरूसँग कुरा गर्दै मृतकको संख्या अझै बढ्न सक्ने चेतावनी दिएका छन्। तीव्र हावा र अत्यधिक गर्मीका कारण डढेलो अनियन्त्रित बनेपछि सरकारले नुब्ले र बायोबियो क्षेत्रमा संकटकाल घोषणा गरेको छ।

डढेलोका कारण बायोबियो क्षेत्रमा मात्रै करिब ३०० घरहरू ध्वस्त भएका छन् भने देशभर यो संख्या एक हजार नाघ्न सक्ने अनुमान गरिएको छ। हालसम्म २४ हजार हेक्टरभन्दा बढी वन क्षेत्र सखाप भइसकेको छ। सुरक्षा संवेदनशीलतालाई ध्यानमा राख्दै पेन्को, नासिमिएन्टो र लाजा जस्ता नगरपालिकाहरूमा रात्रिकालीन कर्फ्यु आदेश जारी गरिएको छ।

विपद्को सामना गर्न करिब ४ हजार अग्नि नियन्त्रक र सैनिक टोली परिचालन गरिएको छ। ५० हजारभन्दा बढी मानिसलाई सुरक्षित स्थानमा स्थानान्तरण गरिएको छ। चिलीमा सन् २०२४ को फेब्रुअरीमा भएको डढेलोमा १३० भन्दा बढीको ज्यान गएको थियो, जसलाई देशकै ठूलो प्राकृतिक विपद् मानिन्छ। -न्युज नेपाल एजेन्सी