नेपालगंज निषेधित क्षेत्र घोषणा, उल्लघंन गर्नेलाई कडा कारवाही
भण्डाफोर अभियान संवाददाता
बाँके/कोरोना भाइरस संक्रमितको संख्या बढेपछि नेपालगन्ज उपमहानगरपालिकामा तीन दिनलाई निषेधित क्षेत्र घोषणा गरिएको छ । जिल्ला अधिकारी कुमारबहादुर खड्काको अध्यक्षतामा सोमबार बसेको सर्वदलीयरसर्वपक्षीय बैठकले आज (मंगलबार) देखि लागू हुनेगरी बिहीबार मध्यरातसम्मलाई नेपालगञ्ज उपमहानगरपालिका क्षेत्रलाई निषेधित क्षेत्र घोषणा गरिएको उपमहानगरपालिकाका मेयर डा. धवल शमशेर राणाले जानकारी दिए ।
बैठकले सब्जीमण्डीलाई अर्को निर्णय नभएसम्मका लागि बन्द गर्ने निर्णयसमेत गरेको छ। बैठकले सुरक्षा र स्वास्थ्यकर्मी तथा स्वाब संकलन गर्ने र कन्ट्रयाक्ट ट्रेसिङका जनशक्तिबाहेक अन्यलाई आवागमनमा पूर्ण रुपमा रोक लगाउने निर्णय गरेको छ। आफ्नो क्षेत्र सुरक्षित गर्ने बहानामा कुनै पनि किसिमले बाटो छेक्ने र राजमार्ग रोक्ने कार्य कोहीकसैबाट गर्न नपाइने र त्यस प्रकारको कार्य गरेमा कानूनी कारवाहीसमेत गर्ने निर्णय भएको छ।बैठकले सामाजिक तथा धार्मिक सद्भावमा आँच आउने र खलल पर्ने सामग्री प्रकाशन, प्रसारण र पोष्ट गर्ने व्यक्तिको पहिचान गरी तत्काल कानूनी दायरामा ल्याउने पनि निर्णय गरेको छ । नेपालगन्जमा शुक्रबार, आइतबार र मंगलबार गरी २३ जनामा कोरोना संक्रमण देखिएको छ । कोरोनाको संक्रमण बढ्नुका साथै संक्रमणको आशंका गरिएका मानिस धेरै भएपछि उपमहानगरपालिकालाई निषेधित क्षेत्र घोषणा गरिएको हो ।
बैठकमा भएको निर्णय अनुसार निषेधित क्षेत्रमा कसैलाई पनि हिँडडुल गर्न दिइने छैन् । त्यसका लागि उपमहानगरपालिका र जिल्ला प्रशासन कार्यालयले संयुक्त रुपमा माइकिङ गरी सूचना प्रवाह गरिरहेका छन् । अत्यावश्यक कामदेखि बाहेक कसैलाई घरबाट ननिसक्न प्रशासनले निर्देशन जारी गरेको छ ।
