बारम्बार पहिरो खसेर मुग्लिन-नारायणगढ सडकखण्ड अवरुद्ध हुँदा यात्रुको बिचल्ली

भण्डाफोर अभियान संवाददाता

 |  प्रकासित मिति : १८ श्रावण २०७९, बुधबार ०२:३९

चितवन/मुग्लिन-नारायणगढ सडकखण्डमा बारम्बार पहिरो खसेर सडक अवरुद्ध हुँदा गाडी चालक, सहचालक र यात्रुको बिचल्ली भएको छ ।

सोमबार रातिदेखि बन्द भएको सडक गएराति साढे १० बजेतिर बल्ल खुलेको थियो । तर, खुलेको चार घण्टामा फेरि पहिरो खसेपछि सडक अवरुद्ध भएको छ । चितवनको भरतपुर महानगरपालिका २९ मा पर्ने केराबारीमा ठूलो पहिरो गएको छ ।

सोमबार राति पनि यही ठाउँमा ठूलो पहिरो गएको थियो । पहिरो र रातभरिजसो परेको पानीले यात्रुले सास्ती पाएका छन् । खाना खान र पानी पिउन तथा दिसापिसाब गर्न नै समस्या भएको यात्रुले गुनासो गरेका छन् । यात्रुहरु भोक, तिर्खा र गर्मी सहेर बस्न बाध्य छन् । पानी र खानेकुरा नपाए तत्काल प्रहरीमा खबर गर्न जिल्ला प्रहरी कार्यालय चितवनका डीएसपी एवं प्रवक्ता नरहरि अधिकारीले आग्रह गर्नु भएको छ ।
पहिरो खुलाउन समय लाग्ने भन्दै उहाँले कुनै समस्या परे तत्काल प्रहरीको १०० नम्बर वा ट्राफिक पहरीको १०३ अथवा जिल्ला प्रहरी कार्यालय चितवनमा खबर गर्न आग्रह गर्नु भएको हो । यस्तै, उहाँले बस्तीको छेउछाउमै गाडी रोकेर बस्न पनि आग्रह गर्नु भएको छ ।