अरिङ्गालको टोकाइबाट एक जनाको मृत्यु

रुकुम/अरिङ्गालको टोकाइबाट रुकुम पश्चिमको त्रिवेणी गाउँपालिका १ का ३८ वर्षीय सुवर्ण सुनारको मृत्यु भएको छ ।

गाउँपालिकाका प्रमुख प्रशासकीय अधिकृत प्रेमबहादुर घर्तीका अनुसार तीन दिन अगाडि अरिङ्गालले टोकेका सुनारलाई आज आइतवार उपचारका लागि नेपालगञ्ज लैजाँदै गर्दा मृत्यु भएको हो। सुनार त्रिवेणी गाउँपालिका अन्तर्गत कर सङ्कलन केन्द्र झुल्नेटामा कर सङ्कलक पदमा कार्यरत हुनुहुन्थ्यो ।

साथीहरूसँग सल्यानको बाँफुखोलामा अरिङ्गाल झार्न गएको बेला उहाँलाई ५० वटाभन्दा धेरै अरिङ्गालले टोकेको थियो । अरिङ्गालले टोकेपछि तीन दिनसम्म झुल्नेटामा रहेको स्वास्थ्य संस्थामा उपचार गरिएको थियो ।