विश्वभर एकैदिन थपिए ३४ लाखभन्दा धेरै ओमिक्रोन सङ्क्रमित

भण्डाफोर अभियान संवाददाता

 |  प्रकासित मिति : ६ माघ २०७८, बिहीबार ०३:२६

काठमाण्डौं/विश्वभर दैनिक रुपमा कोरोना सङ्क्रमित थपिने सङ्ख्याले नयाँ रेकर्ड बनाएको छ । गत २४ घण्टामा मात्रै ३४ लाखभन्दा धेरै नयाँ सङ्क्रमित थपिएको वल्डोमिटरले जनाएको छ । योसँगै विश्वभर कोरोना सङ्क्रमण पुष्टि हुनेको सङ्ख्या ३३ करोड ९१ लाख नाघेको छ ।
यस्तै २४ घण्टामा १७ लाख २८ हजार सङ्क्रमित निको भएसँगै विश्वभर कोरोना जित्नेको सङ्ख्या २७ करोड २६ लाख नाघेको छ ।
यसैगरी ८ हजार ५ सय ८० जनाको मृत्यु भएसँगै कोरोनाले ज्यान गुमाउनेको सङ्ख्या ५५ लाख ८२ हजार नाघेको छ । विश्वमा अझै पनि ६ करोड सक्रिय सङ्क्रमित रहेकामा ९६ हजारको अवस्था जटिल रहेको र बाँकीको अवस्था सामान्य रहेको वल्डोमिटरले उल्लेख गरेको छ ।
यसैबीच विश्व स्वास्थ्य सङ्गठन डब्लूएचओले कोरोना भाइरसको सङ्क्रमण सकिएको भ्रममा नपर्न चेतावनी दिएको छ । डब्लूएचओका महासचिव डा. टेड्रोस गेब्रेसियसले संसारभर ओमिक्रोनको अस्वभाविक वृद्धिसँगै नयाँ भेरियन्ट देखिन सक्ने भन्दै तत्काल कोभिड महामारी अन्त्य नहुने चेतावनी दिनुभयो ।
ओमिक्रोन यसअघिका भेरियन्टभन्दा कमजोर भएको भन्दै लापरवाही हुन थालेपछि उहाँले नजरअन्दाज नगर्न विश्व समुदायसँग अपील गर्नुभएको छ ।